മലപ്പുറം: പ്രവാസി ഇന്ത്യക്കാരെ കാനേഷുമാരിയില്‍ ഉള്‍പ്പെടുത്തണമെന്ന്‌ മുസ്‌ലിംലീഗ്‌ സംസ്ഥാന ജനറല്‍ സെക്രട്ടറി പി.കെ. കുഞ്ഞാലിക്കുട്ടി ആവശ്യപ്പെട്ടു. കുടുംബം പോറ്റാന്‍ വേണ്ടി വിദേശത്ത്‌ പോയവരെ സാങ്കേതികമായി വളര്‍ച്ച പ്രാപിച്ച ഈ സാഹചര്യത്തില്‍ കണക്കെടുപ്പില്‍ ഉള്‍പ്പെടുത്താന്‍ വലിയ പ്രയാസമുള്ള കാര്യമല്ല. വിദൂര സ്ഥലങ്ങളില്‍ ജോലി ചെയ്യുന്ന വിവിധ സര്‍ക്കാര്‍ സര്‍വ്വീസിലുള്ളവരെ കാനേഷുമാരിയില്‍ ഉള്‍പ്പെടുത്തുന്ന രീതിയില്‍ തന്നെ പ്രവാസി ഇന്ത്യക്കാരെയും ഉള്‍പ്പെടുത്തണം. എംബസികള്‍ മുഖേന പ്രവാസി സമൂഹത്തോട്‌ നീതി ചെയ്യണം.
പ്രധാനമന്ത്രിയുടെ ശ്രദ്ധയില്‍ ഇക്കാര്യം കൊണ്ടുവരും. 24ന്‌ കൊച്ചിയില്‍ എ.കെ. ആന്റണിയടക്കമുള്ള കേന്ദ്രമന്ത്രിമാര്‍ പങ്കെടുക്കുന്ന യു.ഡി.എഫ്‌. യോഗത്തില്‍ ഈ വിഷയം പാര്‍ട്ടി ഉന്നയിക്കും. ഡല്‍ഹിയിലുള്ള എം.പി.മാരുമായി ഇക്കാര്യത്തെക്കുറിച്ച്‌ ചര്‍ച്ച ചെയ്‌തിട്ടുണ്ട്‌.
പ്രവാസി ഇന്ത്യക്കാരെ കണക്കെടുപ്പില്‍ നിന്ന്‌ മാറ്റിനിര്‍ത്തുന്നത്‌ നീതിയല്ല. ഇവര്‍ക്ക്‌ വോട്ടവകാശം നല്‍കുന്നതിനെക്കുറിച്ച്‌ രാജ്യം ആലോചിച്ച്‌ കൊണ്ടിരിക്കുന്ന പശ്ചാത്തലത്തില്‍ പ്രവാസി ഇന്ത്യക്കാരെ മാറ്റിനിര്‍ത്തുന്നത്‌ കൂടുതല്‍ സങ്കീര്‍ണ്ണ പ്രശ്‌നങ്ങളുണ്ടാക്കും. രാജ്യത്തിന്റെ സമ്പദ്‌വ്യവസ്ഥയില്‍ മുഖ്യ പങ്ക്‌ വഹിക്കുന്നവരാണ്‌ പ്രവാസികള്‍. വാര്‍ത്താലേഖകരുമായി സംസാരിക്കവെ കുഞ്ഞാലിക്കുട്ടി പറഞ്ഞു.
Subscribe to:
Post Comments (Atom)
No comments:
Post a Comment